Kosova, në pritje të FIFA-s për miqësoren me Brazilin

Kosova është ende në pritje të vendimit të FIFA-s rreth takimit miqësor me Kombëtaren olimpike të Brazilit. Menaxheri Mark Biolei, i cili është duke organizuar ndeshjen, ka deklaruar për gazetën kosovare "Express", se FIFA ende nuk ka marr një vendim për zhvillimin e këtij takimi. Ndërkohë, ai shprehet se ka organizuar pothuajse gjithçka lidhur me këtë ndeshje të madhe. "Stadiumi është rezervuar dhe biletat tashmë janë shtypur", tha Biolley për "Express" të enjten. "Na duhet vetëm leja e FIFA-s, që do të merret të premten (sot)", theksoi ai. Edhe drejtuesit e FFK-së, ndonëse janë duke pritur dritën e gjelbër nga FIFA, për ta zhvilluar ndeshjen miqësore me Brazilin, po vazhdojnë me përgatitjet, sikur ajo do të realizohet. "Ne jemi duke u përgatitur në atë mënyrë sikur ndeshja do të zhvillohet. Më 23 korrik duhet të udhëtojmë drejt Zvicrës. Jemi në kontakt të vazhdueshëm me organizatorët dhe po presim përgjigjen e FIFA-s", tha presidenti Vokrri. Përballja me Brazilin do të shënonte edhe ndeshjen e parë ndërkombëtare të përfaqësueses së Kosovës pas pavarësisë së 17 shkurtit 2008. Por, lajmet se Kosova mund të luajë një ndeshje miqësore me kombëtaren "seleçao" kanë irrituar Serbinë. Sipas qeveritarëve dhe drejtuesve të futbollit serb, kjo ndeshje nuk mund të zhvillohet, pasi Kosova nuk është e pranuar nga FIFA e Kombet e Bashkuara.