Kategoria Superiore starton me emocione

Tirana e Vllaznia, përballje në javën e parë

Rruga e gjatë drejt kampionatit 2008-‘09 në Kategorinë Superiore ka nisur nga Pallati i Kulturës, ku gjatë mesditës së djeshme u hodh shorti i sezonit të ri. Pas fjalës hapëse të shefit të marrëdhënieve me median në FSHF, Tritan Kokona, ceremoninë e përshëndeti presidenti i FSHF-së, Armand Duka. Në fjalën e tij, kreu i institucionit që drejton futbollin në vend nuk harroi të theksonte nivelin e lartë të kategorisë elitare në sezonin e kaluar, që dhuroi emocione deri në javët e fundit. "Me një punë ndryshe në Federatën Shqiptare të Futbollit dhe me një organizim perfekt, duke pasur parasysh edhe eksperiencën e viteve të shkuara, unë jam i bindur se dhe të gjithë ne besojmë se sezoni i ri do të dhurojë spektakël për futbolldashësit shqiptarë, ku padyshim urojmë që të fitojë më i miri. Uroj futbollistët e trajnerët dhe i falënderoj ata për kontributin e tyre në zhvillimin e futbollit shqiptar", tha Duka. Në shortin e parë të këtij lloji të organizuar nga FSHF goglat janë tërhequr nga moderatorja Anjeza Maja, e cila shoqërohej nga dy figura të shquara të futbollit shqiptar: Fatmir Frashëri, ish-futbollist, trajner dhe president i Tiranës dhe ish-lojtar i Vllaznisë dhe Kombëtares, Hysen Zmijani.

Që prej shortit u zbulua se ashtu si në edicionin e kaluar, Tirana e Dinamo do t‘i luajnë ndeshjet në stadiumin "Selman Stërmasi", e për këto dy skuadra u caktuan me short të veçantë numrat 1 e 12, ku për blutë u tërhoq gogla me numrin 1, ndërsa për bardheblutë mbeti numri 12. Ndërkohë, Partizani do vazhdojë t‘i zhvillojë ndeshjet në stadiumin "Qemal Stafa". Në bazë të skemës së përcaktuar më parë, java e parë e Superiores, që do të luhet më 24 gusht, do të startojë me një ndeshje të madhe, ku Vllaznia pret Tiranën në Shkodër. Fillimi i vështirë i bardhebluve vazhdon në javën e tretë, me derbin përballë Partizanit, ndërsa në javën e shtatë ata luajnë me Dinamon kampione në fuqi. Pas sfidës me Tiranën, dinamovitët nga ana e tyre luajnë me Partizanin në javën e 8-të. Në fazën e dytë, Partizani përballet me Tiranën në javën e 14-të dhe me Dinamon në javën e 19-të. Dinamo pret Tiranën në javën e 18-të.