Besa

Vjen Fitim Haliti, golashënuesi kosovar

Sulmuesi i Besës së Pejës dhe golashënuesi më i mirë i Superligës së Kosovës, Fitim Haliti, ka nënshkruar kontratë njëvjeçare me skuadrën kavajase, Besa. Këtë e ka konfirmuar edhe vetë futbollisti. "Presidenti i Besës së Kavajës më ka ofruar kushte të mira dhe kam nënshkruar kontratë njëvjeçare me këtë ekip", tha Haliti për gazetën kosovare "Express". Pavarësisht konkurrencës që ka te verdhezinjtë, Haliti beson se do të fitojë një fanellë titullari në ekipin e ri. "Kam ndjekur ndeshjen e Intertotos ndërmjet Besës dhe Grasshopersit. Është konkurrencë e madhe në këtë skuadër, por me punë dhe cilësitë që kam besoj se do të zë vend në ekipin e Besës", shprehu me besim Haliti. Në sezonin që e lamë pas, sulmuesi 26-vjeçar arriti të shënojë 28 gola, duke u shpallur golashënuesi më i mirë në Kosovë. "Besoj se edhe me Besën e Kavajës do të arrij të shënoj gola", theksoi Haliti, i cili javën e ardhshme pritet t‘i bashkohet ekipit të drejtuar nga Iliaz Haxhiaj.