Emri i Maqedonisë, sot nisin negociatat me Greqinë

Ndërmjetësi i OKB-së shkurton etapat e bisedimeve mes palëve

Ndërmjetësuesi i OKB-së për çështjen e emrit, Metju Nimiç, do të zhvillojë sot në Nju Jork një takim me negociatorin grek, Adamantis Vasilakis. Siç është paralajmëruar në këtë takim, ndërmjetësuesi Nimiç do të dëgjojë qëndrimin e Greqisë për çështjen e emrit, ndërsa në fillim të muajit të ardhshëm do të ofrojë një kornizë të re për zgjidhjen e kontestit. Javën e kaluar Nimiç realizoi takim me negociatorin maqedonas, Nikolla Dimitrov. Sipas burimeve, negociatori maqedonas ka deklaruar se Maqedonia nuk do të pranojë kurrfarë propozimi që do të prekë identitetin maqedonas. Televizioni grek, NET, bëri të ditur para disa ditësh se Maqedonia nuk ka pranuar pakon e fundit të ideve për emrin, të ofruara nga ndërmjetësi i OKB-së, Metju Nimiç.

Televizioni grek, duke cituar burime diplomatike, njofton se Nimiç në takimin me përfaqësuesit e grupit negociator nga Shkupi ka shpalosur katër variante për emrin e Republikës së Maqedonisë. Siç bëhet e ditur nga variantet e propozuara, dy më kryesoret janë emrat: Maqedonia Veriore dhe Maqedonia e Epërme. Por, delegacioni maqedonas, i udhëhequr nga kryenegociatori Nikola Dimitrov, ka hedhur poshtë këto propozime, duke tërhequr vërejtjen se Maqedonia nuk dakordohet me heqjen e identitetit të saj kombëtar. Sot, ndërmjetësi Nimiç do të takohet me negociatorin grek, Adamandios Vasilakis. Kryeministri maqedonas, Nikolla Gruevski, pas miratimit të qeverisë së re më 26 korrik, pritet që të nisë edhe negociatat për emrin. Partneri shqiptar i Gruevskit, kreu i BDI-së, Ali Ahmeti, gjatë një interviste për të përditshmen greke, "Ta Nea", të dhënë para disa kohësh, theksoi se "çështja e kontestit të emrit ka zgjatur. Sigurisht që përgjegjësi kanë edhe faktorët e tjerë politikë, por, potencoj edhe njëherë, përgjegjësia më e madhe mbetet te Kryeministri. Një ndër prioritetet e partisë sonë politike është anëtarësimi në UE dhe NATO. Ne kemi kontribuar dhe do të kontribuojmë në të ardhme për arritjen e një zgjidhjeje të pranueshme. Padyshim Greqia, që u dëshmua edhe me Samitin e Selanikut dhe me investimet e bëra në Maqedoni, ka dëshmuar se është interes i të gjithëve që jo vetëm Republika e Maqedonisë, por edhe rajoni të anëtarësohen në UE dhe NATO. Një ndër parimet e politikës sonë të jashtme është fqinjësia e mirë me të gjithë dhe ne shpresojmë se pas kompromisit që do të arrihet, marrëdhëniet ndërmjet dy shteteve tona do të zhvillohen me hapa edhe më të mëdha".