Bëhen gati pasaportat e shtetit të Kosovës

Dokumentet e udhëtimit, që do të shpërndahen më 21 korrik, po përgatiten në Gjermani

Qytetarët e Kosovës do të kenë së shpejti në duart e tyre dokumentin kryesor të udhëtimit, pasaportat e reja. Pasaporta do të jetë në 3 gjuhë, ndërsa dizajni dhe të dhënat personale janë bërë me teknologjinë më të përsosur. Pritet që dokumenti i identifikimit për kosovarët të përfundojë deri më 21 korrik.

Pasaportat e Republikës së Kosovës janë duke u prodhuar në Lajpcig të Gjermanisë dhe i plotësojnë të gjitha standardet evropiane. Dizajni dhe të dhënat personale janë bërë me teknologjinë më të përsosur dhe është e pamundur të falsifikohen. Kjo pasaportë i plotëson të gjitha rekomandimet e organizatës ndërkombëtare të aviacionit civil dhe të Bashkimit Evropian, pasi teknika e prodhimit të pasaportave ka shkuar sipas propozimeve të dhëna nga BE-ja. Siguria e pasaportave është e nivelit mjaft të lartë, sepse të dhënat personale të shënuara në pasaportë janë të dukshme vetëm përmes rrezeve ultravioletë. Pasaportat e shtetit të Kosovës vlerësohen lart edhe nga zyrtarë të Ministrisë së Punëve të Brendshme në Gjermani. Ata theksojnë se nuk duhet të ekzistojë asnjë lloj dyshimi dhe frike për sa i përket cilësisë së pasaportave. Pasaportat e reja do t‘u shpërndahen të gjitha shteteve anëtare të OKB-së. Kjo do të bëhet nga Ministria e Punëve të Brendshme, me qëllim që ato të shohin nga afër pasaportat e reja të Republikës së Kosovës. Miratimi i pasaportave të reja është një hap i radhës i rëndësishëm për Kosovën, pas shpalljes së pavarësisë. Deri tani qytetarët e Kosovës kanë udhëtuar me dokumentin e UNMIK-ut, i cili nuk është njohur nga shumë shtete. Shumë vende të botës që e kanë njohur Kosovën si shtet sovran kanë bëtë të ditur se do të njohin edhe pasaportat e reja, por procesi ka hasur në disa vështirësi.

Sllovakia zyrtare është shprehur kundër njohjes së pasaportave të reja të Republikës së Kosovës. Shteti sllovak deklaroi se në territorin sllovak nuk do lejohen të hyjnë as edhe ata kosovarë të cilët disponojnë pasaporta të Republikës së Kosovës me viza Shengen në to. Kështu, duke filluar nga data 18 korrik e këtij viti, kur do të nisë shpërndarja në të gjithë shtetasit kosovarë e pasaportës me mbishkrimin Republika e Kosovës, Sllovakia nuk do të japë pranimin e saj të këtyre dokumenteve. Një lajm i tillë është bërë i ditur nga Ministria e Jashtme e Sllovakisë gjatë ditës së sotme. "Ne nuk e njohim Kosovën e pavarur, pra as dokumentet e tyre", ka thënë zëdhënësi i diplomacisë sllovake. Gjithashtu, duke shprehur edhe një herë qëndrimin e saj kundër pavarësisë së Kosovës, zëdhënësi i Ministrisë së Jashtme sllovake, Jan Skoda, ka thënë se "edhe më tutje do të njohim pasaportat që lëshon UNMIK-u dhe ato të Serbisë". Në këtë mënyrë, njoftimi i kësaj ministrie ka bërë të qartë qëndrimin se në territorin sllovak nuk do lejohen të hyjnë as edhe ata kosovarë të cilët disponojnë pasaporta të Republikës së Kosovës me viza Shengen në to.

Sipas Ministrisë së Brendshme të Kosovës pasaportat e shtetasve kosovarë do të zëvendësojnë ato të UNMIK-ut dhe do të kenë standardin më të lartë të sigurisë në rajon të rekomanduara edhe nga ekspertë të Komisionit Evropian.