Bashkohen partitë shqiptare në Luginën e Preshevës

Dy partitë më të mëdha në Luginën e Preshevës, Partia për Veprim Demokratik (PVD) dhe Partia Demokratike Shqiptare (PDSH) kanë arritur një marrëveshje për bashkëqeverisje në Komunën e Preshevës.

Dy partitë konkurrente me njëra-tjetrën kanë arritur marrëveshjen para skadimit të afatit për konstituimin e institucioneve të reja komunale pas zgjedhjeve të majit në Serbi. Marrëveshja është arritur midis kryetarit dhe deputetit të PVD-së, Riza Halimi, dhe kryetarit të PDSH-së, Ragmi Mustafa, që njëherazi ushtron edhe postin e kryetarit të Komunës së Preshevës. Jo zyrtarisht bëhet e ditur se postin e kryetarit të komunës do ta drejtojë kandidati i PVD-së, ndërsa atë të kryetarit të Kuvendit Komunal nga radhët e PDSH-së, por do të pasojnë edhe ndarje të pushtetit në instanca të tjera komunale. Seanca konstituive e Kuvendit Komunal të Preshevës do të zhvillohet sot, vetëm një ditë para skadimit të afatit ligjor. PVD dhe PDSH në zgjedhjet lokale kanë arritur numrin më të madh të këshilltarëve komunalë. Në Luginën e Preshevës shqiptarët kanë fituar vetëm një vend në Parlamentin e Serbisë, ku deputet është kryetari i Partisë për Veprim Demokratik, Riza Halimi.