Ministrat e Mbrojtjes të NATO-s diskutojnë për Kosovën

Në Bruksel është zhvilluar dje takimi dyditor i ministrave të Mbrojtjes të vendeve anëtare të NATO-s. Temë kryesore ka qenë edhe situata në Kosovë. Ministrat pritet të diskutojnë edhe për krijimin e forcës së re të sigurisë në Kosovë. Takimi mbahet në kohën e transferimit të kompetencave nga UNMIK-u te misioni i EULEX-it. Në takimin e lartë të NATO-s do të diskutohet edhe për situatën në Afganistan dhe raportet e aleancës me Rusinë. Diplomati gjerman Halsman tha për mediat serbe se prioritetet e qeverisë serbe, integrimet evropiane dhe mbajtja e Kosovës në kuadër të Serbisë, janë kundërthënëse.

"Qeveria e re serbe angazhohet për dy qëndrime që e përjashtojnë njëra-tjetrën. Së pari, ajo pohon se nuk e ka ndërmend që të lëshojë pe sa i përket pavarësisë së Kosovës, ndërsa po ashtu pohon se do të punojë në integrimin e shpejtuar të Serbisë në strukturat euroatlantike. Por, këto dy gjëra nuk shkojnë bashkë!", tha Halsman duke vlerësuar se këto dy qëndrime janë vënë para qeverisë së re me gjasë shkaku i përfshirjes së socialistëve serbë në koalicionin e ri të atjeshëm qeveritar.