Një dokumentar dhe pak lot për Mir Lelin

Me anë të një filmi dokumentar është përkujtuar dje figura e Fatmir Lelit, një prej ish-kameramanëve më të vjetër të Televizionit Shqiptar, që vitet e fundit punoi në "Top Channel". Një vit më parë, Fatmir Leli (miqësisht thirrej Mir Leli, ose thjesht Leli), ndërroi jetë papritmas. Ndaj për të, gazetari Dëfrim Methasani, ka përgatitur dokumentarin me titull "Një jetë e këputur në mes", një film homazh për atë njeri që konsiderohet koleg e mik i të gjithëve, pavarësisht faktit nëse të gjithë punuan apo jo drejtpërdrejt me të. Në 30 minuta dokumentar me imazhe dhe fotografi, Methasani kishte fokusuar jetën kryesisht profesionale të Lelit. "Jeta na mëson të respektojmë prezencën, gjithashtu na mëson se duhet të respektojmë dhe mungesën. Për më tepër kur ndër to është dhe emri i mikut tonë Fatmir Leli. Këto homazhe janë të denja për personalitetin e tij", u shpreh Methasani. Fatmir Leli konsiderohej veteran i RTSH-së, paçka se kurrë nuk jepte shenjat e një moshe të thyer për shkak të natyrës së tij tejet miqësore e gazmore e rinore gjithashtu. Ndër shumë operatorë, ai pati fatin që në karrierën e tij, të rrokte me objektivin e kamerës disa momente dhe situata që mund të konsiderohen historike për Shqipërinë. Leli njihej për zhdërvjelltësi në xhirime, për nuhatje të thellë të plan-pamjeve, për fokusime plot gjuhë të plan-detajeve, aq sa xhirimet e tij meritonin të kategorizoheshin si "të panevojshme për koment".