Si e njohim Dritan Hoxhën

Flasin në "Exclusive" Nikoll Lesi, Ylli Rakipi, Artur Zheji, Remzi Lani, Koço Kokëdhima, Rudina Xhunga, Alban Dudushi, Agron Llakaj, Filip Çakulli dhe Sokol Balla

Në këtë mënyrë i janë drejtuar kolegët, miqtë dhe njerëzit që punuan me Presidentin e "Top Media"-s, Dritan Hoxhën, gjatë këtyre viteve. Nëpërmjet emisionit "Exclusive", miqtë që e rrethonin Tanin e "Top"-it mundën të thoshin atë që ata nuk patën mundësi t‘ia përcillnin gjatë kohës kur Dritan Hoxha ishte mes tyre. Faleminderit! Nikoll Lesi, duke kujtuar takimin e tij të parë para pesë vjetësh me Presidentin e kompanisë "Top Media", shprehet se ai arriti të bënte gjëra të mira, duke futur në Shqipëri për herë të parë epokën dixhitale. Një tjetër mik i tij, Ylli Rakipi, kujton se "ka qenë një ndër miqtë e mi të paktë dhe të mirë. Ishte njeriu që hapi një fill drite, që tani e shohin të gjithë. Që ai të jetë këtu, duhet shumë punë, shumë seriozitet, përndryshe do të ishte një vdekje e dytë, më e papranueshme se kjo e para". Gur themeli dhe diamant i vyer cilësohet nga analisti Artur Zheji, i cili ka një njohje prej 10 vjetësh me Presidentin e kompanisë më të madhe mediatike në Shqipëri. "Në kohën kur unë e kam njohur tingëllonte i pabesueshëm, kishte prekur vizionin dhe imazhin e asaj që nuk ishte, por që sot u bë realitet. Ai njeri nuk matet nga fjalët, por nga vlerat dhe produkti", tha Zheji, duke shtuar se "kur gjeni si Tani shuhen, vendi i boshllëqeve është i pritshëm. Shpresoj që perandoria ‘Top Media‘ të mos humbë".

Botuesi Koço Kokëdhima citon se "njerëzit gjykohen nga veprat, disa bëjnë vepra, disa flasin pa bërë vepra. Tani bëri një vepër madhështore, bëri një gjetje spektakolare. I dha një populli të tërë një jetë që nuk e kishte".

Botuesi Kokëdhima citon se "historia e Tanit të ‘Top‘-it për mua do të jetë një legjendë, që i dha kuptim piramidës. Ishte gjeniu i piramidës". Ai shton se vdekja e liderit të këtij biznesi sjell një komplikacion jo lehtësisht të parashikueshëm dhe kërkon një kujdes të madh nga të gjithë ata njerëz që kanë përgjegjësi për këtë pasuri të çmuar. "Ajo mund të humbasë shkëlqimin që i jepte mjeshtri i saj. Ajo nuk duhet të humbë pozitën. Ajo është pasuri e çmuar dhe stafi i ‘Top Media‘-s ka përgjegjësi të vazhdojë rrugën", thotë ai. Gjashtë vjet që njihet dhe punon me Tanin e "Top"-it, Rudina Xhunga i përshkruan si një ëndërr që i ishte premtuar, pa iu thënë se ishte përgjithmonë. "Gjithmonë kur shkoja jashtë Shqipërisë kisha merak t‘ia tregoja Tanit, sesa e donin ‘Top‘-in. Na pyeste: Na shohin? Jo vetëm na shohin, por edhe na duan", thotë ajo. I vetmi peng i mbetur i Rudina Xhungës për njeriun që i dha asaj emisionin më të gjatë në "Top Channel" ishte fjala faleminderit. "I vetmi peng imi ishte që nuk i kam thënë një herë faleminderit, që nuk i kam thënë se kush ishte. Tani e bëri me pasion, e bëri me çmenduri, më mungon ëndrra që më dha Tan Hoxha", tha ajo.

Edhe moderatori Alban Dudushi kujton kohët kur e nisi në "Top Channel", i ardhur nga gazetaria e terrenit dhe për të gjitha ia di për faleminderit, njeriut që themeloi perandorinë mediatike. "Ndërkohë që vazhdoja me orën zero, ishte Tani që propozoi të organizoja një ‘Top Show‘, i pari i këtij lloji në Shqipëri. Ishte vendimi i Tanit që unë duhet ta drejtoja këtë emision. Ai njeri kishte dinamikën dhe ishte i paparashikueshëm", kujton Dudushi. "Duke punuar prej katër vitesh me të, arritëm të përfitonim emocionet që brenda vetes kishin qëllimin për të ecur para dhe për të mos u kthyer mbrapsht". Kështu kujton një tjetër ikonë që mbulon mbrëmjet e të dielave në "Top Channel", Agron Llakaj. "Në 2002-shin u njohëm. Unë drejtoja atë mbrëmje festën e ndërrimit të viteve. Të nesërmen, në barin e hotelit më tha se kam dëshirë të bëjmë një gjë të madhe bashkë. Më tha, Goni, unë TCH e krahasoj me ‘Canale 5‘, jo me Shqipërinë. ‘Portokallia‘ është kthyer në akademinë e humorit shqiptar. Është pjesë e rëndësishme e kësaj perandorie të madhe", vijoi ai. Publicisti Remzi Lani e kujton Tanin e "Top"-it si një nga vlerat e mëdha të këtij vendi. "Një nga pak gjërat ku Shqipëria është përpara të tjerëve është televizioni dhe teknologjia dixhitale", thotë ai.

Filip Çakulli shprehet se "ky ‘Fiks‘ nuk mund të bëjë pa qenë Tani dhe nuk mund ta bëjë asnjë televizion tjetër veç ‘Top Channel‘. Tani nuk ndërhynte asnjëherë për tema dhe probleme të ‘Fiks‘-it. Ai do t‘i mungojë medias shqiptare për sa kohë të dalë një Tan tjetër, nëse del". Drejtori i departamentit të informacionit në "Top Channel" shprehet se Dritan Hoxhën nuk arriti askush ta njihte përpos familjarëve. "E ngriti perandorinë e tij mediatike nga hiçi dhe ai në ngritjen e kësaj perandorie pati pikë referimi realitetin mediatik botëror. Ferrari ishte pika e referimit për shpejtësinë. Ka makina të mira, por Ferrari është diçka tjetër. Ky ishte modeli i tij për të hyrë në treg. Unë bleva Ferrarin dhe më pas bleva pilotët", thotë Sokol Balla. Duke bërë këtë paralelizëm midis shpejtësisë së Ferrarit dhe energjisë së tij për të çuar median përpara, Balla shprehet se kjo ishte filozofia e tij.

"‘Top Channel‘ do të vazhdojë dhe do të jetë televizioni më i dashur për shqiptarët. Dritani mblodhi rreth vetes profesionistët më të aftë. ‘Top Channel‘ është emblema e një Shqipërie të re", tha ai. Balla shprehet se "treni i kësaj shoqërie është drejt progresit dhe Tan Hoxha do të vazhdojë të jetojë akoma. Ishte unik me aftësi gjeniale. Ishte babai i revolucioneve mediatike. Ai iku ashtu siç jetoi me 300 km në orë".