Palermos i mungojnë titullarët, Edgar Çani, pranë debutimit

Sulmuesi i talentuar shqiptar Edgar Çani është shumë pranë debutimit në Serinë A me skuadrën e Palermos. Futbollisti i është bashkuar ekipit të drejtuar nga Guidolin gjatë merkatos së janarit, pasi u ble për 1.2 milionë euro nga Peskara që militon në Serinë C. Ndonëse Palermo po planifikonte që t‘i jepte më shumë kohë lojtarit për të treguar vlerën dhe për të fituar disa minuta në fushë, pezullimet mund ta detyrojnë Guidolin ta hedhë atë në fushë të paktën në pjesën e dytë të ndeshjes kundër Kaljarit. Në këtë ndeshje do të mungojnë të dy titullarët e vijës së sulmit, braziliani Amauri dhe italiani Mikoli, të cilët deri tani kanë qenë të paprekshëm në formacion. Kjo ka bërë që Guidolin të mendojë për aktivizimin e sulmuesit shqiptar, një prej alternativave të pakta që ka në këtë repart. Sipas mediave italiane, futbollisti i ri shqiptar do të jetë në pankinë, për t‘u aktivizuar vetëm në pjesën e dytë të takimit. Titullar në këtë sfidë do të jetë i vetëm uruguaiani Kavani, i blerë gjatë verës nga Palermos, por nëse Guidolin do të kërkojë një formacion më sulmues, pritet që Çani të zbresë në fushë në pjesën e dytë. takimi mes Palermos dhe kaluarit do të luhet në stadiumin "Renzo Barbera", ndaj Çani do të ketë mundësinë të debutojë para tifozerisë palermitane.