Fanellat

"Puma" kërkon sërish Shqipërinë

Kompania "Puma", e njohur në të gjithë botën për prodhimin e veshjeve sportive kërkon të bëhet sërish furnizuesja zyrtare e ekipeve kombëtare shqiptare. Përfaqësuesi i kësaj marke, Erik Eipëll, ka mbërritur në Tiranë dhe do të zhvillojë takime me drejtues të lartë të FSHF-së. "Në qendër të bisedimeve do të jetë oferta që kjo firmë e njohur do t‘i bëjë federatës për edicionin e ardhshëm futbollistik", pohoi zyra e shtypit në FSHF. "Puma" ka dizajnuar fanellat e kombëtares kuqezi për një periudhë 8-vjeçare, nga viti 1996 deri në vitin 2004. Aktualisht, për fanellat e përfaqësueses u kujdes kompania e njohur angleze, "Umbro", kontrata e së cilës skadon në maj të këtij viti. Të interesuar për të veshur kombëtaren e vendit tonë janë edhe dy gjigandët botërorë të veshjeve sportive "Nike" dhe "Adidas". "Në garën për t‘u bërë furnizues zyrtar të Shqipërisë janë edhe këto dy firma të mëdha, vazhdoi Nurishmi. Ato kanë kontaktuar me FSHF-në, por ende nuk ka një vendim përfundimtar".