Si na vjedhin pikat e karburanteve

Investigimi i "Fiks Fare" në Tiranë: Pistoletat, të riprogramuara nga shitësit

Si na vjedhin pikat e karburanteve kur mundohemi të furnizojmë makinën? Investigimi i gazetarëve të emisionit "Fiks Fare" tregoi dje se si na vjedhin pikat ku shitet karburant në kryeqytet. Meqë e kishim të pamundur të matnim sasinë e karburantit që hidhet nëpër serbatorët e makinave, gjetëm një rrugë tjetër më të thjeshtë. Gazetarët e "Fiks Fare", me dy bidonë në dorë shkuan të blinin nga 10 litra benzinë dhe naftë, në çdo pikë karburanti që hasën rrugës. Pothuajse në çdo pikë karburanti sasia e naftës dhe e benzinës që blemë ishte poshtë shenjës që tregonte 10 litra. Binte në sy se benzina, e cila është edhe më e shtrenjtë, rezultonte gjithmonë më shumë mangët. Kur i pyesnim personat që tregtonin karburant se përse na dilte më pak karburant në bidonët tanë, na përgjigjeshin se ishte problem i pompës. Disa të tjerë ngrinin supet. Madje kishte edhe nga ata që pretendonin se benzina ishte më e hollë se nafta dhe për këtë arsye sa herë që blinim benzinë na dilte më pak se nafta. Disa të tjerë thoshin se ishte problem i enës me të cilën ne kryenim matjen. Por edhe kur përdorëm enën e taruar, përsëri benzina dilte 50-100 ml mangët në çdo 10 litra që blinim. Për ta çuar deri në fund investigimin tonë, kërkuam ndihmën e specialistëve të Metrologjisë dhe Kalibrimit. Me ta shkuam kontrolluam 110 pistoleta karburanti dhe matëm 2200 litra naftë dhe benzinë. Procesi ishte i gjatë. Gjatë kësaj mësuam se pistoleta, pas kontrollit nga specialistët përkatës, vulosej nga kjo drejtori. Këtë vulë sigurie nuk duhet ta lëvizë dhe ta falsifikojë askush. Por siç duket, pas kësaj vulosjeje pistoletat programohen përsëri. Shkeljet që konstatuam ishin të rënda. Çdo subjekt u gjobit me nga 500 mijë lekë. Kishte subjekte kur mangësia në peshë ishte shumë më e madhe se sa 100 ml. U gjobitën dy pika karburanti të kompanisë "Alpet" në Tiranë, një pikë karburanti e kompanisë "Rompetrol" dhe një pikë e kompanisë "Elda".


Kur i pyesnim personat që tregtonin karburant se përse na dilte më pak karburant në bidonët tanë, na përgjigjeshin se ishte problem i pompës. Disa të tjerë ngrinin supet