NEKROLOGJI

U nda nga jeta Adnan Qatipi, kryetar i Komitetit Kombëtar të Organizatës së Veteranëve të LANÇ-it të Popullit Shqiptar. Zemra e tij pushoi së rrahuri të mërkurën, më 1 shtator 2010, pas një sëmundjeje të papritur e të rëndë. Për vite me radhë, Adnan Qatipi drejtoi Organizatën e Veteranëve të LANÇ-it. Si personalitet i spikatur i Rezistencës Antifashiste në Luftën e Dytë Botërore, ai ka dhënë kontribute të çmuara edhe në Organizatat Ndërkombëtare të Veteranëve Rezistencës Antifashiste. Ai ishte zgjedhur edhe President Nderi i Organizatës Ndërkombëtare FIR (Federata Ndërkombëtare e Rezistencës). Me vdekjen e tij, familja humbi njeriun më të dashur, veteranët e pasardhësit, bashkëpunëtorët e luftës e të punës humbën shokun e armëve dhe drejtuesin e tyre dinjitoz e largpamës.